“ P A M O L U S A N ”
Ekkel na di hurumhon
Dohot las ni roha
Marningot haetehon
Najolo, andorang so marsikkola
Ho do na hehe parade sipanganon dohot akka nohombar tu sadari i
Alai dung magodang ahu, ahu na hehe
Mangalompa indahan dohot lompan
Borhat tu sikkola; “lao ahu da inong, lao ahu da among...”
Mulak sian sikkola
Molo dang mangan di balian, mulak tu jabu
So i nama las ni roha, holan huida timus ni tataring ta
"berarti di jabu do umak", inna roha
Huhut manggora; “Umak...”
"Ou, nunga ro ho bapa? Didia anggim?", nimmu...
Huida hundul ho di lambung tataring mangalompa, inong
Ikkau rata, lasiak na hona tutu
Indahan las, gulamo na hona tutung
Aek na tio, sude sipaulak hosa loja
Paruak saotik pintu dapur i, asa mangullus alogo sian hauma
Jala songon parhasak ni aek binanga na lambok i
Partuat ni indahan tu siuben on, maradu hodokan iba
Manganton sude napinatupami inong
"Godang allang, asa hatop magodang"...
Ah... las roha, suang songoni anggi ibotoki
Ganjang ma umurmu da inong...
Di bot ni ari, di balian i
Huihuthon among dohot inong sian pudi
Di partuat ni mata ni ari, pamispis ni rimbus
Hona sada-sada tu bohi, mekkel ahu huida dompak ginjang
Huhut huhusiphon; “Mauliate Tuhan, disude asi ni rohaM”
Jumpang dongan saparmeaman di alaman
Lupa do tikki ala ni las ni roha
Marsilelean, marsigoraan, merende, marmeam, marbada
Hita do najolo, hita do saonari, hita do haduan
Parbada, na jugul do ahu
Alai dung magodang be hita, saonari dang songoni be da?
Alai lobi sian i... Hehe
Ido mambahen sihol di hita
Di boto hamu ahu, songoni nang ahu tu hamu
Marsiantusan hita
Godang do sangkap ni roha, alai mauliate ma di Tuhan
Di pamolusan ta di tano on
Horas-horas ma hita
Di huta nang diparjalangan...
[Gambar: https://www.google.com/url?sa=i&rct=j&q=&esrc=s&source=images&cd=&cad=rja&uact=8&ved=2ahUKEwj2y4XVuL7cAhXIaN4KHXSWAaUQjRx6BAgBEAU&url=https%3A%2F%2Fwww.yukpiknik.com%2Fartikel%2Falasan-rindu-kampung-halaman%2F&psig=AOvVaw1tl1PgPY-I6qMrIEaeRo67&ust=1532752064550446]